Malinawon ug walay natalang bisan unsang kagubot ang pagpahigayon sa Sinulog sa Kabataan sa Lalawigan kagahapon sa Cebu City Sports Center diin gitambongan kini sa kapin 10,000 ka mga bisita.
Matud sa events commander alang sa seguridad nga si Police Captain Dexter Basirgo nga wala silay nadawat nga report kalabot na sa pagpangawat ug uban pang petty crimes atol sa ritual showdown.
Dugang pa niini nga nahimong malinawon ang maong selebrasyon gumikan sa pagtinabangay sa kapulisan alang sa gipatumang hugot nga seguridad.
Nasayran nga gipangdeploy sa maong event ang 600 ka mga sakop sa kapulisan ug 200 usab ka mga sakop gikan sa Armed Forces of the Philippines.
Siguraduhon usab sa kapulisan ang kalinaw sa uban pang mga events atol sa kapyestahan sa Sinulog.
