Mibwelta si Presidential Assistant for the Visayas Michael Dino ngadto sa mga kritiko ni Presidente Rodrigo Duterte nga, matud pa, wala nasayud sa mga gi-atubang nga isyu.
Kini human nga gisaway ni Cebu City Councilor Joy Augustus Young ang solusyon ni Duterte aron mamenosan ang trapiko sa Sugbo.
Kahinumdumang mitambag ang presidente, atol sa pagbisita niini sa Sinulog grand parade, nga sundugon sa Sugbo ang mga traffic solutions sa kaulohan sama lang sa mga imprastraktura sa ibabaw sa dalan.
Nagkanayon si Young nga dili haum ang traffic solution sa Manila sa nasinating problema sa Sugbo.
Tungod niini, gipasabot ni Dino nga usa sa iyang responsibilidad mao ang pagdepensa sa mga baruganan ni Duterte.
Matud ni Dino nga layo kaayo ang kina-adman ni Young sa kina-adman sa presidente.
Gihimug-atan usab niini nga makatabang ang mga traffic models sama lang sa monorail roads ug bus rapid transit aron maarang-arang na ang trapiko sa dakbayan.
Mihangyo si Dino sa mga kritiko ni Duterte nga suportahan na lang alang sa kaayuhan sa Sugbo.
