MANDAUE CITY, CEBU – Nangayo ug pagsabot si Mandaue City Mayor Jonas Cortes sa mga Mandauehanon kalabot na niining pag-apud-apud sa mga hinabang.
Gi-asuy ni Mayor Cortes nga ang 27 ka mga barangay ang naningkamot usab sa ilahang mga emergency purchase, samtang ang LGU usab ang adunay gitagana nga mga relief goods.
Matud pa sa mayor nga nagdungan ug abot ang emergency purchase sa barangay, ingon man ang purchase usab sa LGU, dugangan pa sa amelioration fund sa national government, hinungdan nga nagtipun-og na ang trabaho sa mga barangay.
Subay niini, plano sa opisyal nga ilakip na ang konseho sa dakbayan ang patabangon sa distribusyon, diin aduna kini sila’y mga job order employee nga mahimong palihukon.
Hinuon, gisiguro ni Cortes nga mahatagan gayud ug hinabang sa gobyerno ang tanang Mandauehanon lakip na ang mga nag-abang lang sa sulod sa dakbayan.
Gipahibalo usab sa mayor nga sila mismo ang manghatag sa matag panimalay ug dili na kinahanglan nga mag-linya pa sa barangay hall.
Gisa-ad ni Mayor Cortes nga walay sagol politika ang ilahang paghatag ug hinabang, gani, ipatawag niini ang mga kapitan sa barangay kung ugaling makadungog kini ug reklamo sa mga konstituwente.
