CEBU CITY-Wala pa matud nakadawat ang Barangay Sambag 2 sa P1M financial aid alang sa 80 ka barangay sa Sugbo human nga gipaubos sa ikaduhang hugna ang dakbayan sa sa Enhance Community Quarantine (ECQ).
Kini ang gikompirmar ni Barangay Sambag 2 Kapitan Ryan Aznar kung diin gisaysay niini sa Bombo Radyo Cebu atol sa tulumanong Bombo Barangayan nga niadto pang buwan sa Mayo nagsumiter na kini sa iyang ‘summary of expenses‘ sa nadawat niining P2M financial aid nga maoy unang hinabang nga gihatag sa city government.
Posible matud pa naay ‘mix up’ sa pagtoo sa kapitan sanglit kadto matud pa hinoo’ng naulahi sa pagsumiter sa ilang summary of expenses mao man hinooy unang nakadawat sa cheke.
Sa nasayran niadtong Hulyo 14, girelease ang sa city government ang tag P1M financial aid sa 80 ka barangay sa Sugbo human sa subling pagpaubos sa ECQ.
Hinoon, mipasalig ang kapitan nga padayon ang iyang pagsuporta sa mga programa sa city government ug padayon silang aktibo sa pakigbatok sa Covid-19.
Mensahe usab niini sa iyang mga konstituwente nga dili na magmagahi pa ug magpuyo nalang gyud sa ilang panimay.
