CEBU CITY – Nasakmit sa otoridad ang anaa sa gibana-banaang unom ka kilo sa gituhu-ang iligal nga drogas atol sa gipahigayong buy-bust operation sa Sitio Fatima Homes, Brgy. Inayawan dakbayan sa Sugbo karon adlawa.
Giila ang mga dinakpan nga silang Renante Tacatani 39-anyos ug Reynaldo Siit Atillo 47-anyos kinsa na-aresto sa Sitio Fatima Homes Brgy. Inayawan dakbayan sa Sugbo.
Nakuha gikan sa mga dinakpan ang 6.1 kilograms sa ‘high-grade shabu’ nga adunay gibana-banaang street value nga P41.48 million.
Sa inisyal nga imbestigasyon, nasayran nga usa ka driver technician si Tacatani nga taga Inayawan samtang usa ka taxi driver si Atillo nga taga Naga City. Gikonsiderar nga high value targets ang mga dinakpan kinsa gituhu-ang adunay pa’y laing koneksiyon.
Gipanubayan na sa Cebu City Police Office (CCPO) ug sa Police Regional Office (PRO-7) ang mga posibleng kauban sa mga dinakpan human matod pa nga gidudhang imported ang gituhu-ang iligal nga drogas nga nakuha gikan sa mga suspek.
“This is another breakthrough sa atung effort to stop the proliferation of illegal drugs here in Cebu City,” asoy pa ni PRO-7 Regional Director PBGen. Albert Ignatius Ferro.
Gidayeg ni Gen. Ferro ang pagkugi sa CCPO partikular na ang mga operatiba sa Police Station 8 o Pardo Police Station nga nipahigayun sa operasyon. Apil na usab niini gipasalamatan si ang liderato ni CCPO City Director PCol. Josefino Ligan
“This is a manifestation that illegal drugs exist because of drug trafficking transaction that emanates from jail,”dugang pa ni Gen. Ferro.
Gihan-ay na sa CCPO ang kasong atubangon sa duha, kalapasan sa Republic Act 9165 o Comprehensive Dangerous Drugs Act of 2002.// EKP
