CEBU CITY – Walay problema nga nadawat ang Department of Education (DepEd) – Region 7 atol na sa unang adlaw sa “New Normal” nga klase niadtung Oktubre 5, 2020, adlaw lunes.
Gibutyag kini ni Dr. Salustiano Jimenez, ang DepEd-7 Regional Director, nga wala may naabot nga reklamo sa ilahang buhatan ug nahimong maayo lang ang implementasyon sa unang adlaw sa pagbalik sa klase sa mga pangpubliko nga tunghaan lukop sa rehiyon sa School Year 2020 – 2021.
Matud ni Jimenez nga kung aduna man gani problema, mao lang ang kalisod nga nasinati sa mga magtutudlo sa paghatud sa mga modules ilabi na og ugaling mo-bunok ang uwan.
Apan sigon pa nga dili kini babag arun nga dili na mahinayon ug mapatuman ang kabag-ohan sa edukasyon.
Subay niini, nagpasalamat ang naasoy nga DepEd official sa mga magtutudlo, principal, division superintendent, ilabi na sa mga ginikanan ug uban mga ‘stakeholders’ nga nagpatuman ug klaro sa mga nagkadaiyang modalities, ilabi na sa paggamit ug modules.
Nasayod kini nga dako ug kahasol alang sa ginikanan, ingon man sa mga magtutudlo ang bag-o nga pamaagi sa pagtuon, apan gihangyo niini ang tanan nga magtinabangay lang alang usab sa maayo nga kaugmaon sa mga bata.
Nagkanayon si Dr. Jimenez nga karun ang panahon nga nagkinahanglan ang mga bata sa dako nga abag alang sa ilahang edukasyon hayan nga gamay lang nga sakripisyo alang kanila.
“Praise God kay sa first day of classes nga gipatuman nato ang different mga modalities sa lain-laing mga eskwelahan ug sa lain-laing lugar dinhi sa Central Visaya, kaluoy sa Ginoo wala’y naabot sa atung buhatan nga adunay daghan reklamo. Salamat sa atung mga teachers nga they are doing their best, salamat sa atung mga principal, atung division offices ilabi na karon sa mga ginikanan ug atung mga stakeholders nga anaa gyud ug kanunay nga nagtabang nato“, sumala pa kini ni Dr. Jimenez.
Kahinumdoman nga kagahapong adlawa, hingpit nang gisugdan ang modular learning alang sa mga tinun-an sa public schools lukop Central Visayas.// EKP
