Nagtagbo ang mga operatiba sa Philippine Drug Enforcement Agency (PDEA-7), Police Regional Office – Central Visayas (PRO-7), ug Bureau of Jail Management and Penology (BJMP) alang sa pag-umol ug Technical Working Group (TWG) nga magmonitor sa transaksiyon sa mga jail facilities.
Kini subay na sa nakuhang kapin sa unom ka kilo sa gidudahang shabu atol sa buy-bust operation sa mga kapulisan niadtung Oktubre 5, 2020 sa Sitio Fatima Homes, Brgy. Inayawan dakbayan sa Sugbo. Mokabat sa kapin P41.48-Million ang street value sa mga nasakmit nga iligal nga drogas.
Una niini, gibutyag ni PRO-7 Regional Director PBGen Albert Ignatius Ferro nga ilang susihon ang matod koneksiyon sa mga dinakpan atul sa operasyon nga silang Renante Tacatani ug Reynaldo Atillo nga matod pa anaa sa prisuhan ang source sa drogas.
Imbestigaran sa PRO-7 ang giingong usa ka piniriso gikan sa Cebu City Jail nga gitudlo nga lider sa drug ring nga nag operate dinhi sa probinsya sa Sugbo ug sa Metro Cebu.
Subay niin, lakip sa gimonitor karon sa otoridad ang anaa sa 30 ka gikonsiderar nga high profile inmates sa Cebu City Jail nga gidudahang nalambigit sa iligal nga transaksiyon sa iligal nga drugas sa Metro Cebu.
Lakip sa hugot nga i-monitor sa TWG ang mga isulod nga gamit sa jail facility ilabi na nga mapugngan ang pagsulod sa mga kontrabando sama sa selpon o mga communication devices sa mga prisohan.
PACKAGING SA DROGAS
Gihulagway ni Cebu City Police Office (CCPO) Director PCol. Josefino Ligan nga halos susama ang packaging sa shabu nga nasakmit sa naasoy nga operasyon diin nakaputos kini sa chinese tea bag.
Matud ni PCol. Ligan nga dili kini sama nga nakaputos sa Gold ug Green nga gituohang gikan sa Ygot Drug Syndicate diin nakaputos sa Yellow ang nasakmit ka kagahapon ug gidudahan nga gikan sa laing ang source nga maoy gitudlo nga “Jao” usa ka piniriso sa Cebu City Jail.
Dugang pa ni Ligan nga dili kini ang unang higayun nga nakasikop ang kapulisan og mga drug suspect nga adunay koneksyon sulod sa prisohan diin kadaghan na kini nahitabo.
Nagtimaan ang maong operasyon sa padayun nga pakigbatok sa mga awtoridad sa pakigbatok niini sa illegal nga drugas tali sa panahon sa kwarantina.
Gumikan sa pagluag sa Quarantine Status sa Modified GCQ, mas ni-doblehon pa CCPO ang hugot nga checkpoint sa nagkada-iyang quarantine control point.
‘PDL’ NGA GITUDLONG LIDER SA DRUG RING SULOD SA CEBU CITY JAIL
Misaad si Jail Superintendent Julius Aro sa Cebu City Jail nga ilang subayan kung si kinsa ni alyas ‘Jao’ usa ka Person Deprived of Liberty (PDL) human gitudlo sa mga suspek nga source atul sa gipahigayun nga buybust operation sa Brgy. Inayawan, dakbayan sa Sugbo.
Matud pa ni Aro nga ilang confirm ang identity ni “Jao” kay ubay-ubay na ka mga PDL ang nalambigit sa mga alegasyon sa illegal nga aktibidad.
Diin usa ka dakung problema niini ang talamak nga communication devices sama sa selpon nga makasulod sa prisohan.
Asoy pa niini nga sa pagsugod sa iyang termino usa ka tuig na ang milabay kapin sa 1,000 ka libo na ka mga selpon ang nakumpiska sa mga personnel sa City Jail.
Apan sa nakalabay nga unom ka buwan, gikalipay niini nga gumikan sa lockdown kay nagpungan ang pagsulod sa mga kontrabando sa prisohon tungod gibawal ang mga bisita.
Saysay pa niini nga kasagaran sa mga visitor gikan ang mga kontrabando diin kadaghanan kay sa mga deliveries samtang, aduna usab mga bisita nga i-soksok ang mga kontrabando sulod sa ilang mga private parts arun di masakpan sa ilang mga checker.
Gibutyag usab ni Aro nga arun masunod ang social distancing, kasamtangan suspended ang Greyhound operation karon napanahon sa pandemya.
Sapagkakaron, nakig-alayun na kini sa CCPO Director PCol. Josefino Ligan, sa PDEA -7, ug Regional Intelligence Division (RID) arun ma-aksyunan ang problema sa mga iligal nga transaksyon nga maggikan sa mga selpon sulod sa prisohan ug makuha ug maputol ang iligal nga network sa sulod. // EKP
