CEBU CITY – All systems go na ang pagpabalik sa mga traditional jeepneys sa dakbayan sa Sugbo human ang pipila ka buwan nga walay biyahe tungod sa coronavirus pandemic.
Kini ang gibutyag ni Cebu City Councilor James Cuenco atol sa eksklusibong pakighinabi sa Bombo Radyo Cebu.
Sigon pa ni Councilor Cuenco nga kapin usa ka semana na nga napirmahan ni Cebu City Mayor Edgardo Labella ang Executive Order alang sa pag-umol ug Task Force nga mosusi sa uban pang i-konsiderar alang sa pagpabalik sa mga traditional jeepneys sa syudad.
Nahimo usab nga consensus sa tanan ang pagpabalik ug pasada sa mga traditional jeepneys. Matod ni Cuenco nga i-usa na lang nila ang mga nakuhang suhestiyon ug rekomendasyon gikan sa ilang pagtu-on ug pakigtagbo sa mga stakeholders aron makahimo na sila ug final report kang Mayor Labella.
Sa oras matod pa nga madawat na sa Mayor ang ilang final report, mopadala usab ang Mayor ug suwat sa buhatan sa Land Transportation Franchising and Regulatory Board (LTFRB-7) alang sa pormal nga pagpadagan sa mga jeepneys.
Hinu-on giklaro ni Cuenco nga daan na niyang nahinabi usab si LTFRB-7 Director Eduardo Montealto kalabot sa pagpabalik sa mga traditional jeepneys diin wa na matod pa’y problema gumikan kay makabalik gyud sa pagpamsada ang maong mga jeepneys. Igo na lang usab nga gihuwat sa LTFRB-7 ang suwat rekomendasyon ni Mayor Labella.
Subay niini gihangyo sa konsehal ang mga drivers nga maghuwat lang una sanglit gi-finalize na lang nila ang tanan lakip na ang pag-inspect sa kalidad sa mga jeepneys nga modagan ug balik ingon man ang mga ipatuman nga health and safety protocols sa mga pasahero.
Target sa mga hingtungdang ahensiya nga sa unag semana sa buwan sa Nobyembre makabalik na sa pagbiyahe ang mga traditional jeepneys.// GBS & EKP
