CEBU CITY – Posible nga anggulo sa iligal nga drogas ang motibo sa pagpatay-lubong sa upat ka mga indibidwal nga nakabkaban sa Sitio Bago, Brgy. Cogon, lungsod sa Compostela niadtong Oktubre 6, 2020.
Matod pa kini ni Compostela Police Station Chief PCapt. Vincent Zozobrado nga usa sa upat ka patay’ng lawas ang nailhan na human kini gi-claim mismo sa mga kabanay gahapon.
Gi-ila ang usa sa mga biktima nga si Elmer Iñanora, taga Bulacao Pardo, dakbayan sa Sugbo, kinsa katapusan matod pa nga nakita sa kabanay niadto pang Setyembre 25 ning kasamtangang tuig.
Matod ni Zozobrado, naila sa mga kabanay si Iñanora pina-agi sa tattoo niini sa kamot ug ang apelyedo niini nga nakasuwat sa may dughan nga bahin. Gibutyag sa kabanay niini nga daan nang na-priso si Iñanora ug bag-uhay lang kini nga nakagawas sa bilangguan.
“Sa panag-storya namo sa inahan, matud pa niini nga kung sugoon kuno ni sa mga kaila nga mopalit og ginadiling drogas kay mosugot kini dayun. Mura kini og runner,” asoy pa ni Zozobrado.
Dako ang pagtu-o ni Zozobrado nga igo lang nga gilubong ang upat sa lugar sa Compostela.
“Akong tan-aw aning ikaduha, ikatulo, ika-upat nga lawas kay posibling droga gihapon ang hinungdan sa pagpatay,” dugang pa ni Zozobrado.
Nasayran nga nasuta usab sa pag-autopsy sa mga patay’ng lawas nga pipila na kini ka adlaw nga gipatay una gilubong sa lugar sanglit pare-pareho lang kining anaa sa state of decomposition.
Anaa na sa punerarya ang mga patay’ng lawas ug tulo niini ang gihulat nga ilhon sa mga kabanay.// GBS & EKP
