CEBU CITY – Gikumpirmar ni Cebu City Disaster Risk Reduction and Management Office (CDRRMO) Head Ramil Ayuman atol sa eksklusibong pakighinabi sa Bombo Radyo Cebu nga adunay duha ka indibidwal nga nakabsan sa kinabuhi samtang usa pa ang padayong gipangita human sa grabeng pagbaha niadtong nakalabay nga gabie sa dakbayan sa Sugbo.
Gilangkuban ang mga nitaliwan nilang alyas Kaka kinsang nipugos matod pa nga molabang sa taytayan ingon man ang usa ka senior citizen nga nailang si Labiano De Toya sa Brgy. Lorega kinsa na-trap sa ilang panimalay.
Sa pagsuwat niining balita, padayon pa nga gipangita ang 16- anyos nga lalake kinsa na-missing human nga wala na maabti pa sa mga kabanay niini.
Nagtinabangay ang mga taga CDRRMO, Coast Guard ug uban pang ahensiya sa dakbayan alang sa pag-retrieve sa biktima.
Kini human gimando usab ni Cebu City Mayor Edgardo Labella ang pagpadayon sa retrieval operations sa menor-de-edad.
“Ang problema kay daghan kaayo debris unya kinahanglan og eksperto sa Engineer ug ekipo usab nila, so mao toh ang tung i-roundcall. Atung pa-ipadayun kay order ni Mayor Labella nga i-retrive gyud,” saysay pa ni Ayuman.
Samtang gi-angkon ni Ayuman nga lakip sa nakahatag ug problema sa ilang retrieval operations, ang daghang debris nga nakabara sa kasapaan ug kanal.// GBS & EKP
