CEBU CITY – Gikan sa 10 ka bag-ong kaso niadtung Oktubre 13, nakatala kagabie ang Department of Health Central Visayas og dugang 103 ka mga bag-ong kaso sa COVID-19 pandemic sa rehiyon, sumala pa sa latest case bulletin niini.
Gikan sa 21,619 ka mga total cumulative cases, nisaka ngadto sa 989 ang mga active cases kinsang kasamtangang nagpaalim sa mga tambalanan.
Nakatala usab ang DOH-7 og 48 ka mga bag-ong recoveries maong anaa na sa 19,335 ang mga naayo sa coronavirus.
Samtang duha lang ang natalang kamatayon ug miabot na sa 1,302 ang ihap sa mga nakalas gumikan sa makamatay nga virus.
Natala ang 103 ka mga bag-ong coronavirus cases human nipagawas ang ahensya og kapin 2,700 ka mga test results gikan sa 8 ka mga laboratoryo sa rehiyon.
Base sa mga newly-reported cases, adunay 14 gikan sa Cebu City; duha sa Mandaue City, samtang pito ang gikan sa Lapu-Lapu City, 55 gikan sa Cebu Province; 13 gikan sa Bohol, ug 12 ka bag-ong kaso sa Negros Oriental.// EKP
