CEBU CITY – Naugdaw ang duha ka andana nga pribadong tunghaan nga nahimutang sa Veterans Drive, Brgy. Lahug sa dakbayan sa Sugbo human gilamoy kini sa ni-ulbo nga kayo mag-alas otso nga takna kagabie.
Daling girespondehan sa mga kabomberohan ang nitumaw nga sunog sa Cambridge Child Development Centre nga unang nadawat sa takna 7:45 sa gabie. Gisaka pa kini sa second alarm sa takna nga 7:55 ug sa takna nga 8:05 sa dihang gihulagway nga under control ang sunog. Samtang alas 8:33 sa gabie sa dihang gideklarar na kini nga fire out.
Sa inisyal nga imbestigasyon sa Bureau of Fire Protection Cebu City, gibana-banaang mokabat sa P800,000 ang danyos sa sunog. Kung diin short circuit ang gitan-aw karon nga nag-unang hinungdan sa pag-ulbo sa kayo.
Matud pa ni Fire Officer 2 Emeraon Arceo nga gisuwayan matod pa nga palungon unta sa guard-on-duty ang nisilaob nga kayo gamit ang fire extinguisher apan napakyas kini human nga dali matod pa nga nakakuyanap ang sunog.
“Ingon tung guwardiya, kay kini man ang nahabilin nga napawong kalit ang ilang kuryente ug nagtuo kini nga brownout. Pagbalik sa kuryente kay nagpiti-piti ug nibuto ang ilang circuit breaker sa ground floor,” sigon pa ni Arceo.
Dugang pa niini nga walay na-angol o namatay sa aksidente.
Padayon pa nga gisuta sa kabomberuhan ang dugang impormasyon sa insidente.// GBS & EKP
