CEBU CITY — Gidauban na sa mga sakop sa Bureau of Fisheries and Aquatic Resources (BFAR)-7 ang duha ka mga karton nga gikatahong adunay sulod nga fishery products gikan sa China.
Matud ni BFAR-7 Director Allan Poquita nga nakumpiskar ang maong produkto sa Mactan Cebu International Airport diin niabot kini sa tugpahanan via connecting flight gikan sa Clark International Airport sa Pampanga.
Nakita sa mga sakop sa BFAR-7 Fishery Inspection Quarantine Service nga walay igong importation ug local transport permits ang maong kargamento maong nasakmit kini niadto pang Dominggo sa hapon.
Anaa sa 53 kilograms ang gibug-aton sa maong kargamento ug gipangita karon ang consignee o ang nagpadala niini paingon sa Sugbo.
Gihimug-atan ni Poquita nga angayang subayon ang gikinahanglang dokumento sa mga fishery products nga moabot sa pantalan o tugpahanan aron kalikayan ang posibleng pagkuyanap sa mga sakit nga dala niini.
Giimbestigaran na karon sa BFAR-7 ang forwarding service nga nagdala sa maong kargamento aron masubay kung kinsa man ang tag-iya niini. (gn)
