CEBU – Naila na ang mga namatay nga gituhuang sakop sa New People’s Army (NPA) atol sa bakbakan sa mga sundalo sa 47th Infantry Batallion sa Sitio Langub, Brgy. Cabacnitan, Bilar Bohol.
Sa datos sa 47th Infantry Batallion, giila ang lima ka mga indibidwal nga silang John Rey Bucar alyas Justin sa Bilar, Bohol; Joseph Bautista alyas Bryan sa
Inabanga; Marvin Terig alyas Chris sa Danao; Romeo Navas alyas Marlon sa Batuan ug ang babaye nga giilang si Edionila Nuera alyas Mia.
Nasayran nga nahatod na sa tagsa tagsa ka mga pamilya ang mga patay’ng lawas nga gituhuang NPA samtang nagpadayon ang ‘manhunt’ operation sa tropa sa gobyerno sa lain pang mga kauban sa lima.
Segon kang 47th Infantry Batallion Civil Military Operations Officer, Army Lieutenant Grace Remonde dugay na nga gipanid-an ang maong grupo sa lugar diin posible kini nga nibalik sa dapit aron marekober ang lugar sa Bohol nga gikonsiderar matod pa nga “stronghold” sa maong grupo.
Nasayran nga dugay na nga gideklarar nga “insurgency-free” ang Probinsiya sa Bohol apan matod ni Remonde nga dili usab mabutyag nga nawala na ang maong grupo sa dapit gumikan sa posibilidad nga namahuway ug nag “lie low” lang ang mga nahisgutan.
