CEBU – Nakuryentihan, napaakan sa mga tambuboan, hulmigas ug butiki pipila lang kini sa mga challenges nga gibuhat ni Boy Maas dili aron magpasikat kung di aron makakwarta og ginagmay aron adunay kwartang mapatambal sa iyahang masakiton nga igsuon.
Sa usa ka pamahayag, gibutyag ni “Boy Maas,” o Jan Kiven Sabala Cortez sa tinuod nga kinabuhi, taga Butuan City, Agusan del Norte, , nga wala kini makakwarta sa iyahang mga video content.
Apan mokita kini pinaagi sa pagdawat sa mga challenges nga makita sa iyahang vlog.
Gibutyag niini nga nakadawat kini og P200 dihang nagpapa-ak kini sa hulmigas ug bisan og delikado kaayo nga magpakuryente sa tubig nga gigamit sa pagpangisda, nidawat gihapon kini sa hagit bugti sa P200 nga kantidad.
Aduna usay nihatag og P1,000 ka pesos bugti sa hagit nga magpapa-ak sa tamboboan o bubuyog challenge apan ang resulta, napuno sa burot ug rashes ang iyahang kalawasan lakip na ang simod.
Apan wala gihapon kini mohunong dihang adunay nihagit kaniya nga magpapa-ak sa tuko nga abunda sa Butuan baylo sa P5,000.
Gusto man ni Boy Maas nga undangon ang maong buhat apan dili kini niya mahimo gumikan nagkinahanglan kini og salapi aron makatabang sa ginikakan og sa igsuon nga adunay gihambin nga balatian.
Nasayran nga Grade 2 lang ang nahuman ni Boy ug dili kini kahibaw mobasa hinungdan nga iyahang mga higala maoy mohimo sa vlog ug igo lang siya pagtuman sa mga hagit.
Gawas sa pag-vlogging, andam si Boy Maas nga motrabaho og bug-at nga trabaho sama sa pagpangalsa og mga kahoy aron makabaton og dignidad nga trabaho.
