CEBU – Ugmang adlawa sugaton na sa katawhang Pilipino ang pagsugod sa Semana Santa pinaagi sa pagsaulog sa Palm Sunday o Adlaw sa Palaspas o Bendita sa Lukay.
Katong tuiga, mabalik na ang naandang kalihokan sa semana santa tungod sa mga pagluag sa restriksyon.
Ug lauman nga modagsa ang mga tawo nga magdala og lukay aron mabenditahan sa simbahan.
Gipasabot ni Efren Yap Delapeña , usa ka Catholic faith defender, nga gitawag nga Palm Sunday ang maong adlaw gumikan mao kini ang pultahan o pagsugod sa Semana Santa diin nagpasabot kini sa malampusong pagsulod ni Kristo sa Jerusalem diin gisugat kini sa mga tawo pinaagi sa pagwara-wara sa palmera ug paghanig og palmera sa agianan ni Hesus.
Nahimo nang tradisyon sa mga Pilipino ang maong kalihokan ug makita na usab ang pagbandera sa nagkadaiyang manindahay og lukay sa nagkadaiya usab nga mga simbahan sa nasod.
