CEBU – Lisud bantugon ang breast cancer ilabi na kung adunay diabetes ang nag-antos niini ug dili usab maayo ang pagkontrol sa blood sugar gumikan makapataas kini sa risgo sa kamatayon.
Kini base na usab sa datos sa usa ka pagtuon nga gilangkuban sa 488 ka kababayen-an nga adunay metastatic breast cancer, kansang cancer nikatap na sa nagkadaiyang organs.
Susamang anaa sa 50% ang kinatibuk-ang survival rate lima ka tuig human sa cancer diagnosis sa mga babaye nga adunay diabetes ug niadtong walay diabetes.
Apan taliwala sa mga babaye nga naluwas labing menos walo ka tuig human sa breast cancer diagnosis, anaa sa 67% ang survival rate sa 10 ka tuig alang niadtong adunay diabetes ug 87% alang niadtong walay diabetes.
Ang survival rates sa 10 ka tuig mas taas usab niadtong adunay maayong pagkontrol sa blood sugar (83%) itandi niadtong adunay dili maayong pagkontrol sa blood sugar (63%).
