CEBU – Malampuson nga nasakmit sa kapulisan pinaagi sa panguna ni Police Colonel Glenn Mayam, pangu sa Regional Intelligence Division (RID) sa Police Regional Office (PRO)-7 ang kinilong shabu nga moaabot sa 10 ka kilo kagabie, Hunyo 14, 2022.
Kini human nihimo og usa ka anti-illegal drug operation ang mga operatiba sa Regional Police Drug Enforcement Unit-7 ug Philippine Drug Enforcement Agency-7 sa dan P. Del Rosario Extention sa Barangay Sambag 1, siyudad sa Sugbo.
Nasikop sa maong panghitabo ang manag-bayaw nga sila si Jacquelyn Baron, 49, ug Cornilio Baron, 39, lumad nga taga Barangay Urban sa dakbayan sa San Carlos, Negros Occidental.
Mobalor ngadto sa P68 milyunes ang maong shabu base sa street drug price (SDP).
Gibutyag ni Mayam, nga niabot pa sa duha ka buwan una nahuman ang transaksyon ug gibyahe pa ang naasoyng drugas sakay sa barko paingon dinhi sa Sugbo.
