CEBU – Mokabat sa lima ka Most Wanted Persons sa Cebu Island ang nasikop sa usa ka semana nga Intensified Anti-Criminality Operations sa Criminal Investigation and Detection Group (CIDG-7).
Matod ni Police Colonel Ireneo Dalogdog,ang regional chief sa Criminal Investigation and Detection Group Regional Field Unit, sa iyang press statement, nga ang nasangpit nga mga operasyon gihimo gikan sa Hunyo 24 hangtod 30, 2022, nga adunay lima ka mga nadakpan nga mga indibidwal tungod sa lainlaing mga sala sama sa rape, double murder, ug carnapping.
Dugang pa ni Dalogdog, nga ang ilang pinakaulahing pagkasikop nahitabo niadtong Hunyo 28, 2022, diin ilang nasikop ang usa ka Erwin Catulpos sa Public Utility Vehicle (PUV) Terminal sa Barangay Pajo Lapu-Lapu City.
Giingung si Catulpos gipangita tungod sa unom ka ihap sa pagpanglugos, ug ang warrant of arrest batok kaniya giisyu ni Judge Jose Alfonso Gomos, Presiding Judge, Regional Trial Court 7 (RTC), Branch 5 sa dakbayan sa Lapu-Lapu niadtong Hunyo 23, 2022, nga walay piyansa nga girekomendar.
Nalista usab kini isip Top 2 Most Wanted Person sa Lapu-Lapu City Police Station 3.
Dugang pa,nga ilang nasikop usab si Kyle Isidro sa Barangay Punta Princesa sa dakbayan sa Sugbo niadtong Hunyo 27 tungod sa carnapping.
Kung diin ang warrant of arrest batok ni Isidro giisyu niadtong Enero 19, 2021, nga walay piyansa nga girekomendar ni Judge Dennis Larrobis, Presiding Judge sa Regional Trial Court 7 (RTC), Branch 76, sa Naga City niadtong Enero 19, 2021.
kung diin alakip usab kini sa Top 1 Most Wanted Person sa Probinsya sa Sugbo tungod sa krimen nga Carnapping.
Sa samang adlaw, usa ka Eduard Abejar, kinsa gipangita sa lima ka ihap sa pagpanglugos, gidakop pinaagi sa warrant of arrest nga giisyu pag-usab ni Judge Jose Alfonso Gomos sa dakbayan sa Lapu-Lapu niadtong Hunyo 23, 2022, nga walay piyansa nga girekomendar.
Giingung si Abejar kay Top 1 Most Wanted Person sa Lapu-Lapu City Police Station 3.
Duha pa ka mga indibidwal ang gidakop usab kaniadtong Hunyo 25, 2022, pinaagi sa mga warrant of arrest alang sa mga paglapas sa rape ug double murder.
Samtang sa pikas kabahin usa ka Fran Alcontin ang gidakop sa Toledo City tungod sa krimen nga pagpanglugos, ug ang warrant of arrest giisyu ni Judge Judilyn Hugo Tapia-Menchavez, Acting Presiding Judge, RTC7, Branch 59, Toledo City.
Ang akusado nalista nga Top 6 Most Wanted Person sa Balamban Municipal Police Station.
Dugang pa, si Erwil Paasa gidakop tungod sa krimen nga double murder pinaagi sa pagsilbi sa warrant of arrest. Gipakita sa mga otoridad ngadto sa akusado ang iyang pending warrant of arrest nga giisyu ni Judge Mendulfo Pintor Jr., presiding judge sa RTC-7, Branch 72, sa dakbayan sa Lapu-Lapu niadtong Hunyo 24.
Nalakip usab siya sa Top 2 Most Wanted Person sa Lapu-Lapu City Police Station 4.
