CEBU – Gipahibalo ni Dra. Jessica Maribujoc ang OIC sa Department of Veterinary, Medicine and Fisheries (DVMF) nga dili pa angay ikabalaka ang suplay sa itlog dinhi sa probinsya ug dakbayan sa Sugbo kini human nga adunay mga kahadlok nga ang presyo sa itlog musaka ngadto sa 10 pesos ngadto na sa 15 pesos ang matag bu-ok.
Gitataw sa naasoy nga opisyal, nga daghang itlog dinhi sa Sugbo gumikan kay ang isla sa Bantayan mao man ang ‘egg basket’ sa probinsya ug ang abunda nga poultry industry.
Giklaro niini nga ang Sugbo pa ang mo supply ug itlog ngadto sa ubang bahin dinhi sa Visayas sama nalang sa Iloilo, Negros ug Bacolod, bisan pa ang Bulacan gadawat sa gihapon ug suplay dinhi sa Sugbo.
Ang Luzon ug Mindanao area mao ang critical nga mga lugar gumikan sa presensya sa AH5N1 o Avian Influenza.
Gikalipay usab ni Maribujoc nga ang Sugbo padayun pang AI Free o Avian Influenza Free nga luwas ang mga poultry products sa hulga sa Bird flu.
Lakip sa gipahimangno niini, nga ang mga pasahero nga magbitbit ug mga sud-an sama sa lechon paksiw o mga meat products nga giluto gikan sa Luzon and Mindanao Area mamahimong kompiskahon, kini gumikan usab sa hulga sa African Swine Fever o ASF.
