CEBU – Liboan ka mga tinun-an ug ginikanan ang nidagsa sa nagkadaiyang distribution sites sa Cebu City aron mangayo sa ilang educational assistance gikan sa Department of Social Welfare and Development (DSWD) karung adlawa Sabado, Agosto 20, 2022.
Matod sa DSWD sa Central Visayas (DSWD-7), ang payout alang sa Cebu City-north barangays nga gikatakda karong adlawa ipanghatag sa barangay T.Padilla, Carreta, Day-as, Hipodromo, Lorega, Mabolo, ug Tejero — adto sa T. .Padilla Gym, samtang kadtong gikan sa Cebu City-habagatan nga gikatakdang i-apod-apod karong adlawa, sama sa barangay Calamba, Guadalupe, Labangon, Punta Princesa, Quiot Pardo, ug Tisa — mahimong mo-claim sa ilang hinabang sa Guadalupe Gym.
Gihangyo hinuon sa DSWD-7 kadtong kinsang mga barangay nga wala pa maapil sa schedule sa payout, nga maghulat pa sa dugang anunsyo kon kanus-a sila makasugod sa pag-claim sa ilang hinabang.
Samtang subay sa mitumaw nga mga taho sa giingong gubot nga pag-apod-apod sa hinabang pinansyal sa DSWD central office, gibutyag ni Emma Patalinghug, ang Social worker officer 4 nga ang pipila ka mga local government units dinhi sa Sugbo hapsay ang ilang pag-apod-apod hangtod sa kasamtangan, gumikan kay gi per barangay man kini.
Sa pikas kabahin, gikalipay usab kini sa mga benificiaris sa moang assistance, matud pa ni Lorena Morales, nga dako kini og katabang alang kanila.
