CEBU – Sama ni Cebu City Mayor Michael Rama, nanghinaut usab ang jail warden sa Cebu City Jail Male Dormitory nga adunay sama sa Singapore nga jail facility ang dakbayan.
Sumala pa ni Jail Superintendent Metz Milton Placencia, ang bag-ong warden sa city jail, nga ang usa ka jail facility nga sama sa Singapore, ibase sa United Nations Standards for Treating Prisoners diin ang matag piniriso kinahanglan adunay labing menos 4.7 square meters nga luna matag usa.
Ug aron makab-ot kini, kinahanglang adunay labing menos unom ngadto sa napulo ka ektarya ang city jail.
Nasayran nga gitukod ang Cebu City Jail sa Barangay Kalunasan sa 2,300 metro kuwadrado nga propiedad aron makaakomodar og 2,000 ka mga indibidwal apan karon aduna nay dul-an sa 6,000 ka indibidwal ug ang kahuot maoy nag-unang gikabalak-an sa ilang pasilidad.
Dugang pa sa warden nga giambitan niini ang damgo ni Mayor Michael Rama nga makabaton ug Singapore-like city pinaagi usab sa pagbaton ug Singapore-life jail facility aron usab makahatag sila og dekalidad nga serbisyo sa mga tawo nga gihikawan sa ilang kagawasan.
