CEBU – Pabiling wala ma-ilhi ang mamumuno nga nagpaluyo sa pagpamanhig kang Atty. Karen Quiñanola-Gonzales ug iyang 19-anyos nga lalaki sa Barangay Subangdaku, dakbayan sa Mandaue niadtong Huwebes sa gabii, Septiyembre 1.
Nasayran nga nagtrabaho si Quiñanola-Gonzales isip pangulo sa Business and Marketing Department sa Cebu Port Authority (CPA).
Samtang, subay sa buwan sa pagmando sa balaod kun rule of law month, nipagawas og pamahayag ang Integrated Bar of the Philippines (IBP) Cebu City Chapter, nga nagtanyag og P50,000 nga ganti alang niadtong makatabang sa pag-ila sa mga nagpaluyo sa pag-ambush kang Atty. Quiñanola-Gonzales.
Sa eksklusibong pakighinabi kang Atty. Michelle Palmares , ang presidente sa IBP-Cebu City Chapter, nagkanayon kini nga nahimo ang pagtayag og reward gumikan sa pagtuo nga dili igo ang pagpagawas og statement of condemnation ug mas gikinahanglan ang paghimo og aksyon.
Gani, aktibong molakip sa imbestigasyon ang mga miyembro sa security committee sa chapter nga himuon sa law enforcement authorities
Nanawagan si Palmares alang sa paspas nga paghatag og hustisya batok sa tanang makadaot ug makaguba sa kaayohan sa kadaghanan ug niawhag sa tanan nga magtinabangay aron mapanalipdan ang katungod sa matag tawo ug masiguro ang kaluwasan sa komunidad ilabi na karon nga nagsaulog sa rule of law month.
Nidugang usab ang abogada nga wala magdahom ang ilahang gurpo nga pagsugod sa rule of law month diin nagpreparar sila og daghang aktibidad aron idalit sa komunidad adunay mahitabo sa usa sa ilahang miyembro.
