CEBU – Sa subling pagbalik sa face-to-face classes, gikalingawan sa mga netizen ang mikatap nga video sa social media diin makita ang usa ka magtutudlo nga naggukod sa tinun-an sa kindergarten nga giingong nitakas sa klase.
Makita sa video nga nisakay sa motorsiklo ang magtutudlo nga si Lyca Joy Alvera sa Caroan Elementary School, uban sa kaubang magtutudlo aron gukdon ang 5-anyos nga estudyante nga naglakaw kilid sa dalan.
Matod ni Maam Alvera nga bag-o pa lang misulod sa classroom ang tinun-an dihang nakahuna-huna nga mogawas sa classroom aron mopauli hinungdan nga iyaha kining gigukod ug giagni nga mobalik sa eskwelahan.
Giingong niabot og mga 300 metros ang ginukdanay sa duha.
Wala gipangisgan o gihadlok ni Teacher Alvera ang bata nga giingong usa kini ka energetic.
Sa katapusan, wala mobalik sa tunghaan ang bata ug milahos.
Gikuyogan na lang ni Maam Alvera ang bata hangtod sa pagpauli.
