CEBU – Namulong na si Cebu Gobernador Gwendolyn Garcia sa kasungian sa yuta nga naglambigit sa Kapitolyo ug Eversley Childs Sanitarium sa Mandaue City.
Gitataw ni Garcia nga ang kagamhanang probinsiyal maoy rightful owner sa 25 ka ektarya nga yuta sa Brgy. Jagobiao, diin kasamtangang nahimotang ang Eversley.
Atol sa press conference gahapon Huwebes, Septiyembre 22, gidepensahan ni Garcia ang ilang desisyon sa pagluwat og Notice to Vacate sa Eversley Childs Sanitarium.
Apan kung magdesisyon ang mga hingtungdan nga magpabilin, gihangyo sila sa probinsya nga ‘e-recognize ug e-legitimize’ ang ilang pagpanag-iya, Sa baylo, gitanyagan sila sa gobernador nga mosulod sa usufruct agreement isip usa ka pagkompromiso.
Ang “Usufruct” naghatag ug katungod sa pagpahimulos sa propiedad sa uban nga adunay obligasyon sa pagpreserbar sa porma ug substansiya niini, gawas kon ang titulo nga naglangkob niini o ang balaod naghatag ug laing paagi, o walay lain kondili ang pagtugot lamang sa bisan kinsa nga makatagamtam sa kabtangan sa uban.
Dugang pa, nga si Gov. Garcia nipresentar og orihinal nga mga dokumento isip pruweba nga gipanag-iya sa probinsiya ang maong lote nga gilalisan.
Kini naglakip sa usa ka deed of donation ug deed of acceptance nga gipetsahan niadtong 1930.
