CEBU – Opisyal nang na turn-over sa bag-ong direktor sa Cebu City Police Office (CCPO) nga si Police Colonel Ireneo Dalogdog, nga kung diin si Dalogdog maoy nihulip kang Police Colonel Ernesto Salvador Tagle, kinsa milingkod isip hepe sa kapolisan niadtong Enero 2022.
Nasayran nga si Dalogdog opisyal nga nahimong city director niadtong Oktubre 1 apan ang opisyal nga turnover of office ceremony nahitabo karung adlawa Lunes, Oktubre 3, sa hedkuwarter sa Police Regional Office.
Kung diin si Police Brigadier General Roque Eduardo Vega, direktor sa Police Regional Office (PRO-7), maoy nangulo sa seremonyas niadtong Lunes.
Sa buwag nga pakighinabi sa media, si Dalogdog nagkanayon nga ubos sa iyang pamunoan, iyang segurohon ang kalimpyo sa mga buhatan sa kapolisan. Gawas niini, ipadayon usab niya ang Intensified Cleanliness Policy sa Philippine National Police ug hatagan og pag-ila ang mga takos nga pulis.
Dugang ni Dalogdog nga padayon usab ang ilang paningkamot sa drug war sa dakbayan. Kabahin sa iyang mga plano naglakip usab sa pagpalig-on sa ilang relasyon sa komunidad sa kapolisan tungod kay siya nagtuo nga kini makatabang sa pagpamenos sa krimen.
Gihimug-atan sa bag-ong city director niingon nga usa usab sila ni Rama sa pagkab-ot sa ‘Singapore-like’ city.
