CEBU – Nagkadaiyang mga selebrasyon ang gipahigayon sa mga tunghaan sa rehiyon 7 subay sa World Teacher’s Day karung adlawa.
Gipahibalo ni Dr. Salustiano Jimenez, regional director sa Department of Education region 7, ang culmination sa naasoy nga kalihokan kay gipahigayon man sa probinsiya sa Abra kung diin gitambongan usab kini ni Vice President ug DepEd Secretary Sara Duterte-Carpio.
Matud pa, sila sa mga regional offices kay pinaagi lang sa virtual ang pagtambong.
Gihimug-atan sa opisyal nga importante ang maong kalihokan alang sa pagrekognisar sa ‘efforts’ ug kontribusyon sa mga magtutudlo sa katilingban alang sa katawhan ilabi na sa mga kabatan-onan sa pagkab-ot sa ilahang tagsa-tagsa ka mga pangandoy sa kinabuhi.
Samtang, gitataw usab ni Dr Jimenez nga matag tuig gayud nagkinahanglan ang departamento sa edukasyon ug magtutudlo ilabi na kung adunay pagsaka sa ihap sa mga nagpa-enroll, ingon man kung ilaha nang istrikto nga ipatuman ang pagkonsiderar sa class size hinungdan nga taas ang panginahanglanon sa DepEd.
Sa gipahigayon nga culmination activity, gitataw ni First Lady, Atty. Liza Araneta-Marcos, nga ang sektor sa edukasyon ang angayan nga hatagan ug pagtagad sa Fiscal Year 2023 gumikan kay gikan sa P600 billion nga pondo sa departamento, kapin na sa P700 billion ang ibubo sa national government arun sa pagtubag sa nagkadaiyang isyu sa natad sa edukasyon sa nasud.
