CEBU – Masaligon si Cebu City Mayor Mike Rama nga mabati sa publiko ang pag-uswag sa pagkab-ot sa Singapore-like Cebu City vision sulod sa iyang tulo ka tuig nga termino nga mahuman sa tunga-tunga sa 2025.//
Matod ni Rama ngadili na siya maghulat og ikaduhang termino aron makab-ot ang susama sa Singapore nga kalamboan sa dakbayan.
Gilatid sa mayor ang iyang plano nga magtukod og 200 ka medium-rise buildings (MRBs) sa dakbayan aron ma-accommodate ang mga informal settlers ug kadtong mga pamilya nga mawad-an og puy-anan sa mga proyekto sa pagpaayo sa sapa sa kagamhanan.
Mosuway pagsulod ang panggamhanan sa dakbayan sa public-private partnerships aron sa pagpalambo sa mga proyektong imprastraktura sama sa gisugyot nga monorail system, light rail transit ug cable car system.
Hangyoon usab ni Rama ang nagkadaiyang nasudnong ahensya sa pagbubo sa ilang pundo sa dakbayan sa Sugbo aron matabangan kini sa pagkab-ot sa Singapore-like vision.
Gipahibawo usab ni Rama nga iyang iduso ang pagtukod og bag-ong City Hall nga mahimutang sa South Road Properties (SRP).
Matod niya nga ang plano sa pagbalhin sa City Hall ngadto sa SRP namugna na daghang tuig na ang milabay atol sa termino ni kanhi mayor Tomas Osmeña.
