CEBU – Nanghangyo sa mga land developers si Cebu City Mayor Michael Rama aron tabangan ang City Government nga matuman ang tumong niini nga makatukod og dugang medium-rise buildings (MRBs) alang sa socialized housing program niini.
Tungod niini, si Rama ug Bise Mayor Raymond Alvin Garcia mitambong sa general assembly sa Organization of Socialized and Economic Housing Developers of the Philippines (OSHDP) niadtong Miyerkules, Oktubre 12, 2022.
Matud pa ni Rama nga ang mga private developers maoy tubag sa giplanohang MRBs nga tukoron sa dakbayan.
Kung diin motukod og dul-an sa 200 ka MRBs nga puy-anan sa mga informal settlers ug mga kawani sa gobyerno.
Malaumon ang Mayor, nga adunay laing developer nga mopasalig sa pagtukod og laing MRB human ang pribadong developer nga Cebu Landmasters Inc. (CLI) mitugyan ngadto sa City Government og duha ka lima ka andana nga MRBs nga nahimutang sa Barangay Lorega-San Miguel niadtong Hunyo 2022.
