CEBU – Gikondinar sa kadagkuan sa Department of Education Region 7 ang linu-og nga pagpatay sa usa ka magtutudlo sulod sa tunghaan sa dakbayan sa Naga, probinsiya sa Sugbo.
Sa pakighinabi sa Bombo Radyo Cebu kang DepEd 7 Regional Director, Dr. Salustiano Jimenez, gibutyag niini nga nabalaka ug naguol ang mga magtutudlo sa nahitabo sa ilahang kauban nga si Jhun Leo Pañares sa Inoburan Elementary School sa naasoy nga dakbayan.
Matud ni Jimenez nga gumikan sa insidente kay mas pahugtan pa nila ang seguridad sa mga tunghaan lakip na ang ilahang pakig-alayon sa kapulisan ug mga barangay tanod.
Subay usab niini kay nanawagan ang opisyal sa mga non-government organizations nga tabangan ang mga tunghaan sa pagbutang ug Close Circuit Television Camera (CCTV) arun nga magamit kung ugaling adunay susama nga insidente sa krimen, alang usab sa proteksyon sa mga teaching, non-teaching personnel, ingon man sa mga tinun-an.
Nagpasalamat usab si Dr. Jimenez sa kapulisan sa paspas nga pagsikop sa suspek nga si Elmar Gimeda nga anaa na karun sa kustodiya sa Naga City Police Station.
