CEBU – Nipadayag sa iyahang pagka-alarma ang bag-ong gitudlo nga Bohol Provincial Police Office (BPPO) director nga si Col. Lorenzo Batuan kalabot na sa sunodsunod nga disgrasya sa kadalanan sa Bohol sa miaging mga semana.
Gumikan sa iyahang kabalaka, gipatawag sa director ang 48 ka mga hepe sa kapulisan sa lalawigan.
Atol sa sinemana nga press briefing , gimandoan ni Batuan ang mga police station commanders sa probinsiya sa paghimo og “proactive measures” aron masumpo ang traffic-related nga mga insidente nga misangpot sa pagkaangol, kadaot sa kabtangan, ug kamatayon.
Base sa datus nga gikan sa BPPO nagpakita nga adunay 40 ka traffic-related nga insidente ang natala sa 20 ka lokalidad sa probinsiya sulod sa usa ka semana gikan Nobyembre 14 hangtod Nobyembre 20, 2022.
24 niini nga mga insidente ang misangpot sa pagkaangol, 14 ang miresulta sa pagkadaot sa kabtangan, ug duha ang nakaingon sa kamatayon sa duha ka indibidwal.
Natala ang labing daghang insidente sa Tagbilaran City, nga adunay lima ka insidente, ug Panglao ug Lila nga adunay upat matag usa.
