CEBU – Di mominos tulo ka persons of interest sa pagpusil sa usa ka polis sa lungsod sa San Remigio sa amihanang Sugbo ang gipailawom sa paraffin testing aron masuta ang presensya sa residue sa pulbura.
Kini ang gibutyag ni Police Major Wendell Abellana, hepe sa San Remegio Police Station, nga gipaabot nila karon ang resulta sa test aron masuta kon kinsa kanila ang nakapusil.
Matod ni Abellana nga aduna usab silay tulo ngadto sa lima ka mga saksi nga makahatag og impormasyon sa pagpusil sa 38-anyos nga Police Staff Sergeant Jade Carabuena, kansang kahimtang padayon pang gimonitor sa tambalanan.
Kung kahinumdoman, si Carabuena gipusil sa likod nga bahin sa iyang ulo samtang misulay sa pagbungkag sa away sa Purok Tambis, Barangay Lawis, San Remigio, sa sayong mga oras sa Domingo, Disyembre 4, 2022.
