Cebu Province-Gipasalig ni Cebu Governor Gwendolyn Garcia nga magpadayon ang mga paningkamot sa Probinsiya sa Sugbo uban sa mga sakop sa One Cebu-Interagency Task Force batok sa ilegal nga drugas bisan ug nahulipan nasi Police Brigadier General Roderick Augustus Alba, ang kanhi hepe sa Police Regional Office (PRO-7).
Si Alba girelibohan sa iyang puwesto human sa iyang duha ka buwan nga paglingkod isip hepe sa kapulisan sa Rehiyon 7.
Niadtong Disyembre 7, 2022, ang Kapitolyo kauban ang ubang mga tigpatuman sa balaod ug mga ahensya sa gobyerno lakip ang PRO-7 nga gipangulohan ni Alba nisulod sa usa ka memorandum of agreement (MOA) aron maporma ang One Cebu-Interagency Task Force alang sa panaghiusa nga mga paningkamot sa pagpugong sa droga sa Sugbo Probinsya.
Kung diin matud ni Alba nga ang change of command tungod sa rason nga “career advancement” hinungdan nga gipulihan siya ni Police Brigadier General Jerry Fornaleza Bearis gikan sa PRO-3.
Sa pikas bahin si Garcia, kinsa nagsilbing drug-czar sa Probinsya, niingon nga magpadayon ang task force, busa ang programa batok sa ilegal nga drugas sa Probinsya.
Ang One Cebu-Interagency Task Force gilangkoban sa nagkadaiyang law enforcement ug ubang government agencies sama sa Philippine Drug Enforcement Agency (PDEA-7), PRO-7, Mactan-Cebu International Airport Authority (MCIAA), National Bureau of Investigation (NBI-7), Armed Forces of the Philippines, National Intelligence Coordinating Agency, Philippine Coast Guard – Coast Guard District in Central Visayas, Cebu Port Authority, Maritime Industry Authority, Bureau of Customs, Civil Aviation Authority-7, Bureau of Immigration Cebu District Office, ug ang Integrated Bar of the Philippines Cebu.
