CENTRAL VISAYAS-Nabantayan sa kapulisan sa Central Visayas ang pagkunhod sa crime rate alang sa Pebrero 12 hangtud sa 18 ning kasamtangan nga tuig.
Nakatala ang Police Regional Office 7 ug 61 ka mga insidente sa krimen sa nahisgutang panahon, diin 14 porsyento ang pag-ubos kung itandi sa samang panahon sa nakalabay nga tuig.
Gibutyag ni Police Lieutenant Colonel Gerard Ace Pelare, ang tigpamaba ni PRO 7 Regional Director Police Brigadier General Jerry Bearis, nga ang pagkunhod sa crime rate kay gumikan sa kontribusyon sa Central Public Safety Analysis (CPSA), ingon man ang suporta sa komunidad sa kapulisan.
Ang labing kaylap nga krimen sa Central Visayas kay ang pagpangawat, pagpanulis ug physical injuries.
Matud ni Pelare nga ilahang gibantayan ang mga index crimes tungod kay kini mao ang mo determinar sa kahapsay ug kalinaw.
Gilauman sa PRO 7 nga magpadayon ang pagkunhod sa sunod nga mga semana.
Sa buwan sa Enero, gikataho usab sa PRO 7 ang pagkunhod sa mga insidente sa krimen.
Natala sa kapulisan ang 208 ka mga insidente gikan sa Enero 1 hangtud sa 25, diin 62 nga mas ubos itandi sa susama nga panahon niadtong 2022 diin anaa sa 270 ang natalang krimen.
