CEBU CITY-Miigo ang usa ka sunog sa Barangay Mambaling pipila lang ka oras human napalong ang sunog sa Brgy. Pit-os, dakbayan sa Sugbo niadtong Miyerkules, Abril 19.
Nibutho ang sunog sa Sitio Mangga, Brgy. Ang Mambaling ning Dakbayan sa Sugbo hapit usa ka ang pakigkumbate sa mga kabomberohan sa maong sunog.
Hinuon walay naangol sa maong panghitabo,apan gikompirmar sa mga imbestigador sa kabomberohan nga usa ka 21-anyos nga lalaki nga giilang si Kyle Villacora, nanginahanglan og medikal nga pagtagad human makasinati og kalisod sa pagginhawa tungod sa baga nga aso sa maong dapit.
Mokabat sa 35 ka mga balay ang naugdaw ug 15 kabalay ang nakaangkon og kadaot, nga nagbilin sa labing menos 80 ka mga pamilya o 240 ka mga residente nga walay pinuy-anan. Gibanabanang mokabat sa P3.6 milyones ang danyos.
Nadawat sa mga bombero sa dakbayan sa Sugbo ang alarma sa sunog sa Brgy. Mambaling ala 1:48 sa hapon, o gibana-bana nga lima ka oras human sila nakaresponde sa sunog sa Brgy. Pit-os diin 55 ka mga indibidwal ang na-displace sa sunog.
Giisa dayon nila kini sa unang alarma tungod sa kadaghan sa mga istruktura, nga kadaghanan niini sa light materials.
Dul-an sa usa ka oras ilang nakontrolar ang kayo ug sa kataposan nideklarar og fire out alas 3:05 sa hapon.
Ang sunog sa Sitio Mangga, Brgy. Ang Mambaling maoy ika-43 nga sunog nga natala sa dakbayan sa Sugbo sukad niadtong Abril 1.
