CEBU CITY-Niluwat og direktiba si Cebu City Mayor Michael Rama sa Cebu City Disaster Risk Reduction and Management Office nga imbestigahan ang mga insidente sa ‘animal cruelty’ sa dakbayan sa Sugbo, ug moabag sa pagpasaka og kaso batok sa mga sad-an aron mapasaka ang kaso ngadto sa korte.
Kini human napalgan ang kapin sa 120 ka iro nga gituohang giabandonar sa Barangay Adlaon, dakbayan sa Sugbo ug pito niini ang patay.
Base sa pahayag ni special assistant to the mayor Ramil Ayuman, mokabat sa 127 ka iro ang giingong giabandonar sa ilang caretaker.
Sa inspeksyon sa Department of Veterinary Medicine and Fisheries (DVMF), pito ka iro ang napalgang patay, samtang 120 ang naluwas.
Sa laing bahin, lima ka iro ang namatay human giingong gihiloan sa usa ka subdivision sa Barangay Guadalupe, Cebu.
Nanawagan og hustisya ang tag-iya sa lima ka iro human gidudahan nga gihiloan sa wala mailhing mga tawo sa ilang subdivision.
Matud sa Cebu City Police Office Director Police Colonel Ireneo Dalogdog, nga mopahigayun og imbestigasyon ang Cebu City Police Office (CCPO) sa kamatayon sa lima ka iro nga gituohang gihiloan.
