CENTRAL VISAYAS-Gipahimangnoan pag-usab sa Police Regional Office Central Visayas (PRO 7) ang tanang hepe sa police station nga regular nga bansayon ang ilang mga kawani kon unsaon pagdumala sa saktong pusil human aksidenteng napusilan sa usa ka police patrolman ang iyahang kaugalingun gamit ang iyang service firearm nga miresulta sa iyang kamatayon.
Ang insidente nahitabo sa Barangay Owak, lungsod sa Asturias, gahapon sa buntag Domingo, Mayo 21, 2023.
Ang biktima giila nga si Patrolman Emmanuel Cary Giangan, 28, sakop sa Drug Enforcement Unit sa Tuburan Police Station.
Matod sa tigpamaba sa PRO 7 nga si Police Lieutenant Colonel Gerard Ace Pelare nga tungod kay nalakip na sa training sa PNP (Philippine National Police) ang luwas nga pagdumala sa armas, dili na kinahanglan nga i-require ang tanang polis sa Central Visayas nga motambong og linain nga seminar bahin niini.
Ang live-in partner sa biktima nga si Erika Lysa Labariadua, 23, nitug-an sa kapulisan nga iyang gigakos ang biktima samtang naa sa kwarto ug giingnan nga magpabilin dihang wala tuyoa nga nibuto ang iyang armas.
Matod ni Police Captain Marlon Adao, hepe sa Asturias Police Station, nga naigo sa tiyan ang biktima hinungdan sa pagkadaot sa iyang urinary bladder.
Ang PRO 7 nipadayag sa ilang kasubo sa pagtaliwan ni Giangan ug nisaad nga mohatag og financial support sa pamilya sa biktima.
Sa inisyal nga imbestigasyon sa kapulisan sa Asturias, walay nakitang foul play sa kamatayon ni Giangan, apan gusto nila nga ipaubos sa autopsy ang biktima.
