MANDAUE CITY, CEBU-Gipasaka na ang Kasong kidnapping with serious illegal detention, ug acts of lasciviousness batok sa suspek sa giingong kidnapping sa Mandaue City.
Kini ang gipahibalo ni Police Lieutenant Colonel Franco Rudolf Oriol, deputy city director for operations ug tigpamaba sa Mandaue City Police Office (MCPO), nga gipasaka na sa city prosecutor’s office ang mga kaso batok kang Godiflor Rama, 32, kinsa giingong midagit sa usa ka 8-anyos nga batang Filipino-Korean sa Barangay Bakilid, gahapon Lunes, Agosto 14, 2023.
Duga pa ni Oriol nga si Major Romeo Caacoy, hepe sa Police Station 2, nikompirmar nga kidnapping with serious illegal detention, ug acts of lasciviousness ang gipasaka batok kang Rama.
Gitino sa opisyal nga ang bata niangkon nga gimolestiya siya sa suspek dihang kauban niya.
Hinuon ang suspek mihimakak sa pasangil sa biktima, ug giangkon niya nga giisa lang niya ang iyang kamiseta aron pabugnawon siya.
Apan matud ni Oriol, nga base sa imbestigasyon ug mga pakighinabi, posibleng gikidnap sa suspek ang bata nga adunay malisya nga tuyo.
