CEBU CITY-Dili mo menos sa siyam ka mga pamilya nga nagpuyo sa Barangay Pulangbato, dakbayan sa Sugbo, ang gipabakwit gikan sa ilahang panimalay human sa pagdahili sa yuta.
Gipang-apud-apud sa mga personahe sa Department of Social Welfare Services (DSWS) ang mga sako sa bugas ug pipila ka mga de lata ngadto sa mga biktima.
Gipahibalo ni Harold Alcontin, ang pangulo sa Cebu City Disaster Risk Reduction and Management Office (CCDRRMO), nga gi-una sa iyahang mga kawani ang kaluwasan sa mga residente sa Sitio Riverside pag-abot nila sa area.
Matud pa, dali nila nga gipabakwit ang mga apektadong pamilya ngadto sa ilahang mga kabanay nga nagpuyo lang sa duol, arun lang sila nga malikay sa midahili nga yuta.
Nahitabo ang pagdahili sa yuta gumikan sa kusog nga pag-uwan dala sa Southwest Monsoon o Habagat.
Sigon ni Alcontin nga nihangyo kini sa usa ka pribadong kontraktor nga nanag-iya og propyedad duol sa lugar nga mutabang sa paghawan sa mga debris.
Usa sa mga residente nga si Leo Gerona, ang misaysay sa Bombo News Team nga dili pa gayud luwas ang ilahang area hinungdan nga misunod lang sila sa mando nga mo bakwit ug mo likay una sa apektado nga area arun nga walay madisgrasya.
Samtang, gipahibalo usab ni Dr. Ester Concha, nga gawas sa mga sinako nga bugas ug de lata, ang mga apektadong pamilya makadawat og tag-P10,000 cash aid ug housing materials gikan sa City Government.
Gimandoan usab ni Concha ang iyahang mga personahe sa pagsusi sa mga panimalay sa mga apektadong pamilya arun nga susihon kung nadaut ba o naguba atol sa pagdahili sa yuta.
Sa pagkakarun, ang CDRRMO ug ang Cebu City Environment and Natural Resources Office (CCENRO) nagtrabaho sa usa ka draft nga magdeklarar sa sitio nga usa ka “danger zone”.
Kung kini mapatuman, ang lugar mahimo nang limitado sa mga lumulupyo.
Ning kasamtangan, gihangyo ni Alcontin ang mga opisyal sa barangay nga i-cordon ang lugar.
