Gipasabot ni Stella Ferrarez, RPm (Registered Psychometrician), nga ang tawo nga adunay problema gikinahanglan lang nga makig-istorya arun nga makapadayag sa iyahang bug-at nga gibati, samtang ang tawo nga gi-istoryahan gikinahanglan lang nga maminaw ug ipabati sa tawong problemado nga kini iyahang nasabtan.
Matud pa, importante nga ipabati sa tawo nga problemado nga adunay nakasabot sa iyaha ug ‘valid’ ang iyahang gibati.
Giingong dili kini angayan nga singhagan o kasab-an gumikan kay makapasamot kini sa iyahang psychological stress.
Gidugang ni Ferrarez nga dako nang tabang ang pagka-‘observant’ arun nga makatabang nga makasalbar og kinabuhi, ilabi na sa mga tawo nga depress.
Sugyot sa naasoy nga mental health expert nga ipaubos sa ‘psychosocial processing’ ang mga nakakita sa nahitabo sa Canduman National High School, tungod kay posibli kini sila nga makasinati og Post Traumatic Stress Disorder (PTSD) human sa usa ka buwan.
Nagkanayon si Ferrarez nga karun pa lang, gikinahanglan na ang interbensyon sa mga tinun-an, magtutudlo o bisan kinsa nga nakasaksi sa maong hitabo arun nga dili kini makahatag og acute stress sa mga nahisgutan.
Ang nahitabo sa maong Grade 8 student kay usa sa mga insidente sa teenage depression diin sagad mahitabo gumikan kay wala’y suod sa pamilya o bisan sa barkada nga mahimo niining ma-istoryahan.
Gani, gituohan sa naasoy nga eksperto nga posibling dugay nang gihambin sa maong bata ang problema ug adunay nahitabo o sirkumstansya nga posibling naka-aghat niini nga molayat ug kutlo-on ang iyahang kaugalingong kinabuhi.
