CEBU PROVINCE-Gi-anunsiyo ni Cebu Gov. Gwendolyn Garcia ang pagpabalik sa usa niini ka programa nga mao ang Obra Negosyo Eskwela.
Atol sa gihimong hamubo nga programa sa pag-abli sa Sugbo Negosyo Expo sulod sa usa ka mall, gihimo ni Garcia ang maong announcement.
Sigon niya nga hatagan unya og tahas ang matag mayor sa ilang lungsod ug dakbayan nga mopili og usa ka gamay nga magpapatigayon diin tabangan kini sa Cebu Provincial Government.
Gawas niini, anaa usab mga tinun-an gikan sa mga unibersidad ug kolehiyo sa Sugbo ang moatabang sa Kapitolyo alang niining maong katuyoan.
Kahinumduman nga naundang ang maong programa human natapos ang unang tulo ka termino ni Garcia isip gobernador niadtong tuig 2013.
Ubos sa maong programa, magtambayayong ang Cebu provincial government, ang local government unit ug ang academe aron matabangan nga ma-develop ang produkto sa usa ka magpapatigayon.
Gawas niini, mahatagan usab og higayon ang mga tinun-an nga ma-expose sa real-life scenarios samtang nag-abag sila sa mapilian nila nga gagmay nga magpapatigayon.
Hinoon giklaro ni Garcia nga magpadayon gihapon ang ilahang Sugbo Negosyo Season 3, Enhanced Countryside Development (ECD) Program, ug uban pa.
