MANDAUE CITY-Gipasakaan na og kasong pagpatay ang unom ka mga Chinese national nga giingong mikulata ug mipatay og Nigerian niadtong Oktubre 21.
Kini ang gitino ni Police Lieutenant Colonel Franco Rudolf Oriol, deputy city director for administration ug tigpamaba sa Mandaue City Police Office, bisan og napasaka na ang mga kaso, gawasnon gihapon ang mga suspek.
Nailhan sila pinaagi sa imbestigasyon ug mga interbyu sa kapulisan.
Matod ni Oriol nga gigukod na sila karon sa kapolisan ug ila nang gipahibawo ug gipadala ang mga hulagway sa unom ngadto sa mga tugpahanan ug pantalan aron mapugngan ang bisan unsang pagsulay sa pag-ikyas.
Dugang pa, nga naluwas usab nila ang mga kauban sa trabaho sa biktima nga lainlaig nasyonalidad ug gipatrabaho sa Chinese isip call center agent sa stay-in set-up sa usa ka apartment sa Barangay Alang-Alang, dakbayan sa Mandaue.
Gawas sa mga kaso sa pagpatay, mahimo usab nga pasakaan sa awtoridad ang kasong human trafficking batok sa mga Chinese kung mapamatud-an nga ilegal ang ilang pagpuyo ug negosyo.
