CENTRAL VISAYAS-Anaa na sa full alert status ang Police Regional Office (PRO 7) Central Visaysa sugod karung adlawa Sabado, kini isip pagpangandam sa Barangay ug Sanguniang Kabataan Elections karong Lunes, Oktubre 30, 2023, ug ang pag-obserbar sa Adlaw sa mga Santos ug sa Tanang Kalag sa Adlaw sa Nobyembre 1 ug 2 o mas nailhang Undas.
Matod ni Police Lieutenant Colonel Gerard Ace Pelare, tigpamaba sa PRO 7, andam na ang kapolisan sa pagpatuman sa mga lakang sa seguridad atol sa piniliay, uban sa ilang mga katugbang gikan sa Armed Forces of the Philippines, Philippine Coast Guard, Philippine Navy ug Bureau of Fire Proteksyon.
Ang katapusang batch sa mga pulis gipadala na sa Bohol niadtong Biyernes sa buntag, Oktubre 27, sakay sa barko sa Coast Guard.
Matod ni Pelare nga dili na kinahanglang maalarma ang mga residente kon magkonsentrar ang mga awtoridad sa BSKE tungod kay adunay mga polis nga nag-duty sa matag police station nga motubag sa bisan unsang dili maayong panghitabo.
Dugang pa ni Pelare nga gidugangan usab sa matag police station ang ilang intelligence monitoring sa pagpaabot sa pagsaka sa kriminalidad tungod sa taas nga bakasyon nga dala sa piniliay ug pag-obserbar sa All Saints’ Day ug All Souls’ Day karong Nobiyembre 1 ug 2.
Usa ka adlaw sa dili pa ang piniliay, si Pelare niingon nga ang kapolisan ug mga sundawo magpatrolya sa mga barangay aron malikayan ang pagpamalit og boto.
Gipahimangnoan usab ni Pelare ang publiko nga ilang ipatuman ang liquor ban sugod sa Sabado hangtod sa adlaw sa piniliay.
