CEBU CITY-Gimanduan ni Cebu Governor Gwendolyn Garcia ang kapolisan sa lalawigan sa Sugbo nga bantayan dili lang ang sentro sa munisipyo kon dili lakip na ang mga sementeryo sa hilit nga mga dapit atol sa pag-obserbar sa All Saints ug All Souls’ Days karong Nobiyembre 1 ug 2, 2023.
Nagtuo ang gobernador nga tungod kay gideklarar na sa Police Regional Office (PRO 7) ang full alert status sa tibuok Central Visayas, posibleng malikayan ang mga problema di lang panahon sa piniliay kon dili apil na sa Undas.
Gipahinumdoman usab ni Garcia ang iyang mga konstituwente nga dili moinom og ilimnong makahubog samtang anaa sa sementeryo aron malikayan ang kasamok nga mahitabo.
Personal usab nga gisusi sa gobernador ang Cebu South Bus Terminal (CSBT) aron masuta kon unsay angay buhaton sa dili pa magdali-dali ang biyahe.
Si Garcia nimando sa pagbutang og dugang air coolers alang sa saktong bentilasyon sulod sa terminal.
Moabot sa 50,000 ka mga tawo ang gipaabot nga mopauli alang sa piniliay ug Undas sugod sa Sabado, Oktubre 28, busa kinahanglan nga magbutang ug dugang air conditioning units aron mas komportable ang mga pasahero samtang maghuwat sila nga mosakay sa bus.
