CEBU CITY-Gituki atol sa gipahigayong meeting sa Traffic Management Coordination Board karung adlawa, ang pipila ka traffic ug road issues sa Dakbayan sa Sugbo.
Una niini mao ang mga kabalaka sa trapiko nga dala sa mga dili roadworthy nga mga trak ug mga trailer, nga gimaneho sa mga badlungon ug nag-overspeeding nga mga drayber, ilabi na sa daplin sa SRP coastal road
Subay niini, gipatawag ang mga tag-iya ug operators sa usa ka conference atol sa naasoy nga TMC meeting.
Si Cebu City Councilor Rey Gealon, traffic czar sa dakbayan, nihatag og update sa mga butang nga gituki atol sa tigom sa Traffic Management Coordination Board.
Kung diin, mokabat sa 20 ang mitungha, kinsa nanag-iya o nag-operate sa 114 ka units sa kinatibuk-an nga nagbiyahe sa mga rota sa siyudad.
Ang road worthiness ug safety mao ang nag-unang butang sa agenda gumikan kay natanggong ang ilang mga sakyanan tungod sa pagkaguba sa makina o sa mga ligid, nga nakadugang sa kahuot sa sa dagan sa trapiko.
Nagkadaghan usab ang mga kalapasan sa truck ban tungod kay naobserbahan nga kadaghanan sa mga drayber mas gusto nga hisgutan ug magpadayon sa ilang adlaw nga walay paglangan tungod kay ang multa gamay ra nga anaa sa P500.
Tungod niini, ang TMC nipagawas og resolusyon nga gitumong sa pagpataas sa silot sa kalapasan sa truck ban ug uban pang mga kalapasan gikan sa multa nga P500 ngadto sa labing taas nga P5000.
