CEBU CITY-Padayon sa gihapon ang mga sakop sa kapulisan sa pagpangita sa nakapatay kang Police Corporal Ryan Langudio Baculi atol sa buy-bust operation sa dakbayan sa Sugbo.
Gani, mao kini ang gisaad ni Police Lieutenant Colonel Gerard Ace Pelare, ang tigpamaba sa Police Regional Office sa Central Visayas nga dili kini mohunong hangtud mapriso ang mga sad-an sa kamatayon ni Baculi.
Kahinumduman nga gipusil sa gidudahang mga durugista sa dihang namatikdan nga nakig-atubang sila sa usa ka pulis atol sa pag-transact og drugas niadtong Nobiyembre 15.
Ingon man nga mipasalig si Pelare sa publiko nga magpahigayon pa sila og dedikadong operasyon aron mahatagan og hustisya ang multi-awarded nga pulis nga nakabsan sa iyang kinabuhi samtang nagtuman sa iyang katungdanan.
Sa kasamtangan, nagpabiling at-large ang duha ka mga suspek ug gigukod sa mga tinugyanan sa balaod sa usa ka massive manhunt operation.
