CEBU CITY-Kasagmuyo ang gipaabot sa pipila ka mga coaches sa Badminton sa Cebu City sa gipahigayon nga batang pinoy sa kaulohan.
Diin adunay 17 ka mga delegates sa Badminton nga gikan sa Cebu ang nakasinati og dili maayo nga ‘accomodation’.
Sa pakighinabi sa Bombo Radyo Cebu News Team ngadto kang Rey Coca, ang magtutudlo sa Tejero Elementary School ug ang coach sa Badminton sa Cebu City sa batang pinoy, gisaysay niini nga pag-abot palang nila sa tugpahanan niadtong petsa 15 sa buntag pasado alas 7:30 apan na-pick up na sila pasado alas 9 sa gabii.
Gumikan niini, nahurot ang ilang kusog ilabi na ang mga batang players.
Ug sa ilang pag-abot sa temporaryong mag-estaran, wala na’y foam nga magamit sa ilang mga players ug gawas pa niini, kuwang usab ang mga comfort rooms, ingon man ang tubig nga magamit kon gani mangaligo na ang mga players sa tunghaan kon diin sila kasamtangan nga migamit isip ilang gi-istaran.
Matud pa niini nga kon gani gipasidan-an sila daan nga kon unsay angay dalhon sama sa hapin sa semento, nakadala ang ilang team apan, wala’y klarong impormasyon kabahin sa dili hingpit nga andam.
Subay niini, gisuwayan usab nila nga hangyoon ang pangu sa delegasyon nga mokuha og sa usa ka apartment alang sa kaluwasan ug alang sa mga bata arun makabaton og saktong pahuway apan wala sila tugoti.
