CENTRAL VISAYAS-Nakatala ug 14 ka firecracker-related injuries ang Department of Health sa Central Visayas (DOH-7) gikan sa Disyembre 21 hangtod kagahapon adlawa, Disyembre 27, 2023.
Sa datos nga gipagawas sa DOH-7, walo ka kaso ang natala sa Probinsiya sa Bohol, tulo sa Probinsiya sa Sugbo, duha sa Cebu City, ug usa sa Mandaue City.
Naasoy ni Dr Eugenia Mercedes Cañal, ang pangulo sa Regional Epidemiologist and Surveillance Unit (RESU) sa DOH-7, nga 9-anyos ang pinakabata nga biktima.
Dugang pa ni Cañal nga ang nag-una nga mga pabuto nga hinungdan sa pagkaangol mao ang “lantaka,” goodbye Philippines, ug whistle bomb.
Naglakip usab ang ubang mga kaso sa mga nasamdan gikan sa kwitis, power bomb, shotgun, ug triangle.
Malaumon usab ang DOH nga makatala og zero firecracker casualties ang Central Visayas karong tuiga apan giangkon ni Cañal ang posibilidad nga mosaka ang mga samad sa pabuto atol sa pagsugat sa Bag-ong Tuig.
Subay niini, walay natala nga kaso sa pagputol sa 14 ka firecracker-related injuries ang ahensya og ang DOH-7 walay natala nga kaso sa saag nga mga bala.
