CEBU CITY-Nakakolekta og kapin sa usa ka gatos nga tonelada sa basura ang Barangay Labangon sa dakbayan sa Sugbo nunot sa ilang padayong pagpanglimpyo sa sapa sa Kinalumsan River sa niaging duha ka semana.
Gikabutyag ni Barangay Captain Derrick Yap nga anaa pa sa 50% ang pagpanglimpyo sa nahisgutan nga sapa nga sikbit sa mga silingang barangay.
Matod ni Yap nga magbutang na kini og pukot sa mga utlanan sa sapa sa Labangon ug sa mga silingang barangay niini, ug gikatakdang makigtagbo siya sa mga barangay kapitan nga hingtungdan aron mahiusa ang ilang tumong sa paglimpyo sa mga sapa.
Nagamit niini ang ekipo sa pagpanglungkab sa Department of Public Works and Highways, lakip na ang mga 6-wheeler truck niini, diin gihakot ang mga basura ug lapok.
Gibutyag usab sa kapitan sa barangay nga kinahanglan nilang temporaryong bungkagon ang pipila ka mga rip-rap nga gipanag-iya sa mga pribadong tawo duol sa mga sapa aron mahaum ang backhoe sa pipila ka mga dapit sa Kinalumsan.
