CENTRAL VISAYAS-Nakakumpiskar ang Philippine Drug Enforcement Agency Central Visayas og P204,000 nga kantidad sa gituohang shabu sa gipahigayon nga managlahing anti-illegal drugs operations niadtong Marso 5, 2024.
Ang unang buy-bust operation gipahigayon sa Barangay Lahug ning dakbayan sa Sugbo diin gilunsad sa PDEA 7 nga giubanan sa mga personahe sa Mabolo Police Station.
Human sa tulo ka semana nga paghimo og kaso, nasikop sa mga otoridad ang subject sa operasyon nga si Rosemarie Romano, 46-anyos.
Base usab sa report gikan sa PDEA-7, gi-tag ang maong indibidwal isip regional target-listed drug personality.
Diin nasakmit sa mga operatiba ang 7 ka pakete sa gituohang shabu nga motimbang og 20 grams nga adunay gibanabanang kantidad nga P136,000.
Dugang pa sa tigpamaba sa PDEA-7 nga si Leia Alcantara nga maka-dispose si Romano og 20 grams nga drugas matag semana.
Samtang, milabay ang pipila ka oras, mihimo na usab og og laing buy-bust operation ang PDEA-7 sa Sitio Campaclan, Barangay Poblacion, Sibulan sa probinsya sa Negros Oriental.
Human kini gipaubos og case build-up nga milungtad og duha ka semana.
Ang giingong drug den maintainer giila nga si Rubennie Furton, 33-anyos, usa ka auto electric technician, ingon man nga makadominar kini og 25 gramos sa iligal nga drogas matag semana.
Gani, lakip sa nasikop sa maong pagbungkag mao sila si Michael Frank Renacia, 33-anyos, Rey Velez, 46-anyos nga giingong igo ra nibita sa maong balay.
